Lög SÍSP

Heiti og heimili

1. gr.

Heiti sambandsins er Samband íslenskra sparisjóða og er skammstafað SÍSP.

2. gr.

Heimili SÍSP og varnarþing er í Reykjavík.

Tilgangur, starfsemi og aðild

3. gr.

SÍSP er heildarsamband sparisjóðanna á Íslandi.

Tilgangur SÍSP er:

l. Að standa vörð um hagsmuni sparisjóða og styrkja starf þeirra þannig að þeir verði hæfari til að gegna því hlutverki sínu að efla sparnað og stuðla að heilbrigðu efnahagslífi þjóðarinnar.

2. Að vera málsvari sparisjóðanna og koma fram og gæta hagsmuna þeirra gagnvart stjórnvöldum og öðrum aðilum.

3. Að vera vettvangur sameiginlegra viðræðna og sameiginlegra ákvarðana sparisjóðanna.

4. Að skipuleggja og beita sér fyrir sem víðtækastri samvinnu sparisjóðanna og stuðla að hagræðingu og þróun í starfi þeirra.

5. Að fara með fyrirsvar við gerð kjarasamninga fyrir hönd sparisjóðanna, samkvæmt umboði þeirra.

6. Að vera þjónustuaðili við sparisjóðina.

7. Að annast önnur þau verkefni, sem því kann að vera falið með lögum eða á annan hátt og eru samrýmanleg markmiðum þess og tilgangi.

Aðilar að SÍSP skulu styðja tilgang og starfsemi þess.

4. gr.

SÍSP skal með starfi sínu dreifa upplýsingum og veita sparisjóðunum ráðleggingar og aðstoð í starfi þeirra.

SÍSP getur sett leiðbeiningar þegar um er að ræða samræmingu í starfsemi sparisjóða annars vegar og sparisjóða og fjármálafyrirtækja hins vegar. Varði afstaða SÍSP sérstaklega einn eða fleiri tilgreinda sparisjóði skal SÍSP leita álits þeirra í viðkomandi máli.

5. gr.

Allir íslenskir sparisjóðir geta óskað aðildar að SÍSP með skriflegri umsókn til stjórnar. Stjórn SÍSP fjallar um umsóknina og samþykkir hana eða synjar.

Hver sparisjóður getur sagt sig úr SÍSP. Úrsögn verður að vera skrifleg og afhendast stjórn SÍSP með a.m.k. sex mánaða fyrirvara miðað við áramót. Samkvæmt tillögum stjórnar SÍSP er aðal- eða aukafundi heimilt að víkja sparisjóði úr SÍSP ef sparisjóðurinn brýtur lög SÍSP, vinnur gegn tilgangi þess eða er undir stjórn viðskiptabanka.

6. gr.

SÍSP er vettvangur samstarfs sparisjóða á hverju sviði sem þeir óska óháð fjölda samstarfsaðila. Samstarfsverkefni sem ekki nær til allra sparisjóða skal stjórnað af þeim sem taka þátt í því. Stjórn SÍSP fær ekki sértækar upplýsingar um slík samstarfsverkefni og starfsfólk SÍSP er bundið trúnaði gagnvart hverjum og einum sparisjóði og verkefnum þeirra.

Samstarfsverkefni skulu kostuð að fullu af þeim sparisjóðum sem taka þátt í þeim.

Aðal og aukafundir

7. gr.

Æðsta vald í málefnum SÍSP er í höndum lögmætra aðal- og aukafunda SÍSP.

Aðalfundur skal haldinn fyrir lok október hvert ár. Aukafund skal halda þegar stjórn SÍSP telur þess þörf eða þegar a.m.k. fimm sparisjóðir krefjast þess skriflega og greina fundarefni.

Aðal- og aukafundir skulu boðaðir með ábyrgðarbréfi eða á annan sannanlegan hátt til allra sparisjóða með fimmtán daga fyrirvara hið skemmsta.

Í fundarboði skal getið þeirra mála sem taka skal fyrir á fundinum. Heimilt er á fundi að leiða til lykta málefni, sem eigi er getið í fundarboði, enda sé það samþykkt með 3/4 hlutum greiddra atkvæða.

Fundur, sem boðað hefur verið til með löglegum hætti, er lögmætur þegar fulltrúar fyrir minnst helming heildaratkvæðamagns sækja hann nema öðruvísi sé ákveðið í lögum þessum.

8. gr.

Hver sparisjóður má senda einn eða fleiri fulltrúa á aðal- og aukafundi og skulu þeir annaðhvort vera stjórnarmenn eða starfsmenn viðkomandi sparisjóðs. Skal einn þeirra hafa kjörbréf undirritað af meirihluta stjórnar sparisjóðs og fer hann með atkvæði sjóðsins.

Atkvæðavægi á aðalfundi SÍSP: 1.000 atkvæði í heild sem skiptast þannig að hver sjálfstæður sparisjóður fær 10 atkvæði. Það sem þá er eftir skiptist milli sjálfstæðra sparisjóða í hlutfalli við heildarfjármagn samstæðu (mínus sparisjóðir innan samstæðunnar) í síðasta ársuppgjöri.

Sparisjóður sem er í vanskilum með árgjald SÍSP missir atkvæðisrétt sinn.

9. gr.

Aðal- eða aukafundur kýs fundarstjóra og aðra starfsmenn fundarins. Fundarstjóri úrskurðar um lögmæti fundar.

Atkvæðagreiðsla og önnur málsmeðferð á fundum fer eftir því sem fundarstjóri kveður nánar á um. Þó skal atkvæðagreiðsla jafnan vera skrifleg ef einhver atkvæðisbærra fundarmanna krefst þess. Afl atkvæða ræður ályktunum og ákvörðunum á fundum SÍSP, sbr. þó 7., 8., 20. og 21. gr.

Á aðalfundi skulu eftirtalin mál tekin fyrir:

1. Skýrsla stjórnar um starfsemi á liðnu starfsári.

2. Staðfesting ársreiknings.

3. Breytingar á samþykktum.

4. Kjör stjórnar.

5. Kjör endurskoðanda eða endurskoðunarstofu.

6. Ákvörðun um þóknun til stjórnar.

7. Ákvörðun árgjalds, sbr. 17. gr.

8. Umræður um önnur mál.

Stjórn og framkvæmdastjóri

11. gr.

Stjórn Sísp skipa fimm aðalmenn og tveir varamenn sem aðalfundur kýs til eins árs í senn. Formaður skal kosinn sérstaklega á aðalfundi en stjórnin kýs varaformann á fyrsta fundi stjórnar og setur sér starfsreglur. Kjörgengir til stjórnar Sísp eru starfs- og stjórnarmenn í sparisjóði en þó aðeins einn frá hverjum sparisjóði eða samstæðu.

Varamenn sitja stjórnarfundi ef þeir uppfylla skilyrði um kjörgengi og aðalmönnum er heimilt að senda staðgengil í sinn stað sem áheyrnarfulltrúa.

12. gr.

Formaður boðar til stjórnarfunda. Skylt er að halda stjórnarfund þegar tveir eða fleiri stjórnarmenn óska þess. Stjórnin er ályktunarhæf þegar a.m.k. fimm stjórnarmenn eru á fundi.

Til að samþykkt sé gild skulu a.m.k. fimm stjórnarmenn hafa samþykkt hana. Stjórnin skal færa gerðabók yfir fundi sína og skulu fundarritari og formaður undirrita fundargerð. Stjórnarmenn sem ekki mæta á fundi skulu kynna sér samþykktir sem gerðar eru í fjarveru þeirra.

13. gr.

Stjórnin fer með stjórn á málefnum SÍSP og kemur fram fyrir hönd þess, sbr. þó gr. 6. Hún ber ábyrgð á framkvæmd samþykkta aðalfundar og aukafunda og hefur eftirlit með starfsemi skrifstofu SÍSP. Framkvæmdastjóri, sem stjórn sambandsins ræður, annast daglegan rekstur SÍSP.

14. gr.

Stjórn SÍSP skipar fulltrúa þess í sameiginlegar nefndir sparisjóða, fjármálafyrirtækja og annarra félaga og ákveður afstöðu SÍSP til þeirra mála er koma til ákvörðunar nefndanna, enda séu þær í samræmi við tilgang SÍSP og almenna hagsmuni sparisjóðanna. Leita skal sjónarmiða sparisjóðanna til einstakra mála þegar þau snerta víðtæka hagsmuni hvers þeirra fyrir sig.

15. gr.

Við gerð og framkvæmd kjarasamninga fer SÍSP með fyrirsvar fyrir hönd sparisjóðanna gagnvart þeim stofnunum samfélagsins sem sjá um og koma að kjarasamningum starfsfólks sparisjóðanna.

16. gr.

Einu sinni á ári eða oftar milli aðalfunda skal stjórn boða sparisjóðsstjóra og stjórnarformenn til fundar. Verkefni fundarins skal vera að ræða brýn mál í starfi sparisjóðanna hverju sinni.

Árgjald

17. gr.

Aðalfundur ákveður árgjald fyrir næsta ár sem skiptist hlutfallslega milli sparisjóða. Hlutfallsskipting árgjalds og annars kostnaðar, sbr. 6. gr., er í samræmi við heildareignir samkvæmt samstæðuuppgjöri að frátöldum heildareignum annarra sparisjóða í samstæðunni miðað við síðasta endurskoðaða ársreikning. Yfirlit yfir hlutfallsskiptinguna skal fylgja tillögu um ákvörðun árgjalds sem dreift skal á hverjum aðalfundi. Breytingar frá árgjaldi yfirstandandi árs þurfa samþykki 2/3 hluta greiddra atkvæða. Þeir sparisjóðir sem segja sig úr SÍSP greiða árgjald til næstu ársloka frá úrsögn, sbr. 5. gr.

Árgjald skal standa undir grunnkostnaði og skrifstofuhaldi SÍSP, framkvæmdastjóra, hagsmunagæslu, grunnþjónustu skv. ákvörðun aðalfundar, stjórn, stefnumótun, áætlanagerð og eftirliti. Annar rekstur og verkefni SÍSP skal greiða sérstaklega skv. reikningi og skal standa undir sér.

18. gr.

Reikningsár SÍSP er almanaksárið og skal endurskoðandi hafa fengið ársreikning í hendur eigi síðar en í lok febrúarmánaðar.

Ársreikningur er lagður fram á aðalfundi með áritun endurskoðanda og athugasemdum ef einhverjar eru.

Þagnarskylda

19. gr.

Stjórn, starfsmenn og endurskoðendur SÍSP og hverjir þeir sem taka að sér verk í þágu sparisjóðanna f.h. SÍSP skulu gefa yfirlýsingu um að þeir gangist undir þagnarskyldu um allt það sem þeir fá vitneskju um við framkvæmd starfa síns og varðar viðskipta- eða einkamálefni SÍSP, sparisjóðanna, viðskiptamanna þeirra og önnur atriði sem þeir fá vitneskju um í starfi nema skylt sé að veita upplýsingarnar samkvæmt lögum. Þagnarskylda helst þótt látið sé af starfi.

Breytingar á lögum

20. gr.

Breytingar og viðaukar við lög þessi þurfa samþykki 2/3 hluta greiddra atkvæða á aðal eða aukafundi til þess að þau öðlist gildi, enda hafi þess verið getið í fundarboði að lagabreyting yrði til meðferðar á fundinum og tillögur til lagabreytinga sendar með því.

Slit SÍSP

21. gr.

Ákvörðun um slit SÍSP verður ekki tekin nema á aðal- eða aukafundi og þarf slík ákvörðun 2/3 hluta greiddra atkvæða til þess að öðlast gildi, enda hafi tillögu þar að lútandi verið getið í fundarboði sem um lagabreytingar væri að ræða. Hafi færri sparisjóðir en 2/3 mætt til fundarins skal boðað til framhaldsafundar innan fjögurra mánaða og þurfa þá 3/4 hlutar atkvæða á fundinum að samþykkja ákvörðunina.

Framanrituð lög voru samþykkt þannig á aðalfundi SÍSP 14. október 2005, 11. gr. breytt á aðalfundi SÍSP 19. október 2007 og 8. gr. breytt á aukaaðalfundi SÍSP 7. mars 2008.

Handhægt